is qadar musalsal thiiñ shiddateñ judā.ī kī
aaj pahlī baar us se maiñ ne bevafā.ī kī
varna ab talak yuuñ thā ḳhvāhishoñ kī bārish meñ
yā to TuuT kar royā yā ġhazal-sarā.ī kī
taj diyā thā kal jin ko ham ne terī chāhat meñ
aaj un se majbūran taaza āshnā.ī kī
ho chalā thā jab mujh ko iḳhtilāf apne se
tū ne kis ghaḌī zālim merī ham-navā.ī kī
tark kar chuke qāsid kū-e-nā-murādāñ ko
kaun ab ḳhabar laave shahr-e-āshnā.ī kī
tanz o ta.ana o tohmat sab hunar haiñ nāseh ke
aap se koī pūchhe ham ne kyā burā.ī kī
phir qafas meñ shor uTThā qaidiyoñ kā aur sayyād
dekhnā uḌā degā phir ḳhabar rihā.ī kī
dukh huā jab us dar par kal 'farāz' ko dekhā
laakh aib the us meñ ḳhū na thī gadā.ī kī