jab yaar ne raḳht-e-safar bāñdhā kab zabt kā paarā us din thā

har dard ne dil ko sahlāyā kyā haal hamārā us din thā

jab ḳhvāb huiiñ us kī āñkheñ jab dhund huā us kā chehra

har ashk sitāra us shab thā har zaḳhm añgāra us din thā

sab yāroñ ke hote sote ham kis se gale mil kar rote

kab galiyāñ apnī galiyāñ thiiñ kab shahr hamārā us din thā

jab tujh se zarā ġhāfil Thahre har yaad ne dil par dastak dī

jab lab pe tumhārā naam na thā har dukh ne pukārā us din thā

ik tum hī 'farāz' na the tanhā ab ke to balā vājib aa.ī

ik bhiiḌ lagī thī maqtal meñ har dard kā maarā us din thā