sho.ala thā jal-bujhā huuñ havā.eñ mujhe na do
maiñ kab kā jā chukā huuñ sadā.eñ mujhe na do
jo zahr pī chukā huuñ tumhīñ ne mujhe diyā
ab tum to zindagī kī duā.eñ mujhe na do
ye bhī baḌā karam hai salāmat hai jism abhī
ai ḳhusravān-e-shahr qabā.eñ mujhe na do
aisā na ho kabhī ki palaT kar na aa sakūñ
har baar duur jā ke sadā.eñ mujhe na do
kab mujh ko e'tirāf-e-mohabbat na thā 'farāz'
kab maiñ ne ye kahā hai sazā.eñ mujhe na do