ye be-dilī hai to kashtī se yaar kyā utreñ

udhar bhī kaun hai dariyā ke paar kyā utreñ

tamām daulat-e-jāñ haar dī mohabbat meñ

jo zindagī se liye the udhār kyā utreñ

hazār jaam se Takrā ke jaam ḳhālī hoñ

jo aa ga.e haiñ diloñ meñ ġhubār kyā utreñ

basān-e-ḳhāk sar-e-kū-e-yār baiThe haiñ

ab is maqām se ham ḳhāksār kyā utreñ

na itr o uud na jaam o subū na saaz o surūr

faqīr-e-shahr ke ghar shahryār kyā utreñ

hameñ majāl nahīñ hai ki baam tak pahuñcheñ

unheñ ye aar sar-e-rahguzār kyā utreñ

jo zaḳhm daaġh bane haiñ vo bhar ga.e the 'farāz'

jo daaġh zaḳhm bane haiñ vo yaar kyā utreñ