sāqiyā ek nazar jaam se pahle pahle
ham ko jaanā hai kahīñ shaam se pahle pahle
nau-giraftār-e-vafā sa.i-e-rihā.ī hai abas
ham bhī uljhe the bahut daam se pahle pahle
ḳhush ho ai dil ki mohabbat to nibhā dī tū ne
log ujaḌ jaate haiñ anjām se pahle pahle
ab tire zikr pe ham baat badal dete haiñ
kitnī raġhbat thī tire naam se pahle pahle
sāmne umr paḌī hai shab-e-tanhā.ī kī
vo mujhe chhoḌ gayā shaam se pahle pahle
kitnā achchhā thā ki ham bhī jiyā karte the 'farāz'
ġhair-mārūf se gumnām se pahle pahle