raat ke pichhle pahar rone ke aadī ro.e
aap aa.e bhī magar rone ke aadī ro.e
un ke aa jaane se kuchh tham se ga.e the aañsū
un ke jaate hī magar rone ke aadī ro.e
haa.e pābandī-e-ādāb tirī mahfil kī
ki sar-e-rāhguzar rone ke aadī ro.e
ek taqrīb-e-tabassum thī bahārāñ lekin
phir bhī āñkheñ huiiñ tar rone ke aadī ro.e
dard-mandoñ ko kahīñ bhī to qarār aa na sakā
koī sahrā ho ki ghar rone ke aadī ro.e
ai 'farāz' aise meñ barsāt kaTegī kyūñkar
gar yūñhī shām-o-sahar rone ke aadī ro.e