kahā thā kis ne ki ahd-e-vafā karo us se
jo yuuñ kiyā hai to phir kyuuñ gila karo us se
nasīb phir koī taqrīb-e-qurb ho ki na ho
jo dil meñ hoñ vahī bāteñ kahā karo us se
ye ahl-e-bazm tunuk-hausla sahī phir bhī
zarā fasāna-e-dil ibtidā karo us se
ye kyā ki tum hī ġham-e-hijr ke fasāne kaho
kabhī to us ke bahāne sunā karo us se
'farāz' tark-e-ta.alluq to ḳhair kyā hogā
yahī bahut hai ki kam kam milā karo us se