pyaar kī raah meñ aise bhī maqām aate haiñ
sirf aañsū jahāñ insān ke kaam aate haiñ
un kī āñkhoñ se rakhe kyā koī ummīd-e-karam
pyaas miT jaa.e to gardish meñ vo jaam aate haiñ
zindagī ban ke vo chalte haiñ mirī saañs ke saath
un ko aise ka.ī andāz-e-ḳhirām aate haiñ
ham na chāheñ to kabhī shaam ke saa.e na Dhaleñ
ham taḌapte haiñ to sub.hoñ ke salām aate haiñ
ham pe ho jaa.eñ na kuchh aur bhī rāteñ bhārī
yaad aksar vo hameñ ab sar-e-shām aate haiñ
chhin ga.e ham se jo hālāt kī rāhoñ meñ 'qatīl'
un hasīnoñ ke hameñ ab bhī payām aate haiñ