jo bhī darūn-e-dil hai vo bāhar na aa.egā

ab āgahī kā zahr zabāñ par na aa.egā

ab ke bichhaḌ ke us ko nadāmat thī is qadar

jī chāhtā bhī ho to palaT kar na aa.egā

yuuñ phir rahā hai kāñch kā paikar liye hue

ġhāfil ko ye gumāñ hai ki patthar na aa.egā

phir bo rahā huuñ aaj unhīñ sāhiloñ pe phuul

phir jaise mauj meñ ye samundar na aa.egā

maiñ jāñ-ba-lab huuñ tark-e-ta.alluq ke zahr se

vo mutma.in ki harf to us par na aa.egā