manzileñ ek sī āvārgiyāñ ek sī haiñ
muḳhtalif ho ke bhī sab zindagiyāñ ek sī haiñ
koī qāsid ho ki nāseh koī āshiq ki adū
sab kī us shoḳh se vābastagiyāñ ek sī haiñ
dasht-e-majnūñ na sahī tesha-e-farhād sahī
safar-e-ishq meñ vāmāndgiyāñ ek sī haiñ
ye alag baat ki ehsās judā hoñ varna
rāhateñ ek sī afsurdagiyāñ ek sī haiñ
suufī o riñd ke maslak meñ sahī laakh tazād
mastiyāñ ek sī vāraftagiyāñ ek sī haiñ
vasl ho hijr ho qurbat ho ki duurī ho 'farāz'
saarī kaifiyyateñ sab tishnagiyāñ ek sī haiñ