hikāyāt-e-lab-o-ruḳhsār se aage nahīñ jaate
vo naġhme jo tumhāre pyaar se aage nahīñ jaate
kamandeñ Dālne aa.e the jo bām-e-surayyā par
vahī ab sāya-e-dīvār se aage nahīñ jaate
gadā-e-zāt kyā jāneñ navā-e-kā.enāt ai dil
ye vo mansūr haiñ jo daar se aage nahīñ jaate
baḌī himmat dikhā.eñge to sāhil chhoḌ jā.egā
hamāre nāḳhudā mañjdhār se aage nahīñ jaate
ajab ahl-e-samā.at haiñ jo zanjīroñ se ghabrā kar
tirī pāzeb kī jhankār se aage nahīñ jaate
murattab jin ko apnī ābla-pā.ī nahīñ kartī
vo afsāne gul-o-gulzār se aage nahīñ jaate