aise chup haiñ ki ye manzil bhī kaḌī ho jaise
terā milnā bhī judā.ī kī ghaḌī ho jaise
apne hī saa.e se har gaam laraz jaatā huuñ
rāste meñ koī dīvār khaḌī ho jaise
kitne nādāñ haiñ tire bhūlne vaale ki tujhe
yaad karne ke liye umr paḌī ho jaise
tere māthe kī shikan pahle bhī dekhī thī magar
ye girah ab ke mire dil meñ paḌī ho jaise
manzileñ duur bhī haiñ manzileñ nazdīk bhī haiñ
apne hī paañv meñ zanjīr paḌī ho jaise
aaj dil khol ke ro.e haiñ to yuuñ ḳhush haiñ 'farāz'
chand lamhoñ kī ye rāhat bhī baḌī ho jaise