na dil se aah na lab se sadā nikaltī hai
magar ye baat baḌī duur jā nikaltī hai
sitam to ye hai ki ahd-e-sitam ke jaate hī
tamām ḳhalq mirī ham-navā nikaltī hai
visāl-o-hijr kī hasrat meñ jū-e-kam-māya
kabhī kabhī kisī sahrā meñ jā nikaltī hai
maiñ kyā karūñ mire qātil na chāhne par bhī
tire liye mire dil se duā nikaltī hai
vo zindagī ho ki duniyā 'farāz' kyā kiije
ki jis se ishq karo bevafā nikaltī hai