ye maiñ bhī kyā huuñ use bhuul kar usī kā rahā
ki jis ke saath na thā ham-safar usī kā rahā
vo but ki dushman-e-dīñ thā ba-qaul nāseh ke
savāl-e-sajda jab aayā to dar usī kā rahā
hazār chāragaroñ ne hazār bāteñ kiiñ
kahā jo dil ne suḳhan mo'tabar usī kā rahā
bahut sī ḳhvāhisheñ sau bārishoñ meñ bhīgī haiñ
maiñ kis tarah se kahūñ umr bhar usī kā rahā
ki apne harf kī tauqīr jāntā thā 'farāz'
isī liye kaf-e-qātil pe sar usī kā rahā