ziist kī garmī-e-bedār bhī laayā sūraj

khul ga.ī aañkh mirī sar pe jo aayā sūraj

phir shuāoñ ne mire jism pe dastak dī hai

phir jagāne mire ehsās ko aayā sūraj

kisī dulhan ke jhamakte hue jhūmar kī tarah

raat ne sub.h ke māthe par sajāyā sūraj

shaam ko ruuTh gayā thā mujhe taḌpāne ko

sub.h-dam aap mujhe DhūñDne aayā sūraj

kam na thā us kā ye ehsān ki jaate jaate

kar gayā aur bhī lambā mirā saaya sūraj

Dālte us pe kamandeñ vo koī chāñd na thā

sau jatan sab ne kiye haath na aayā sūraj

ḳhuub vāqif thā vo insān ke andhe-pan se

jis ne bhī din ke ujāle meñ jalāyā sūraj

log kahte rahe sūraj ko dikhā.eñge charāġh

aur hī rañg thā jab sāmne aayā sūraj

shab ko bhī ruuh ke āñgan meñ rahī dhuup 'qatīl'

chāñd tāroñ ne bhī aa kar na bujhāyā sūraj