marhala raat kā jab aa.egā
jism saa.e ko taras jā.egā
chal paḌī rasm jo kaj-fahmī kī
baat kyā phir koī kar pā.egā
sach se katrā.e agar log yahāñ
lafz mafhūm se katrā.egā
e'tibār us kā hamesha karnā
vo to jhūTī bhī qasam khā.egā
tū na hogī to phir ai shām-e-firāq
kaun aa kar hameñ bahalā.egā
ham use yaad bahut ā.eñge
jab use bhī koī Thukrā.egā
kā.enāt us kī mirī zaat meñ hai
mujh ko kho kar vo kise pā.egā
na rahe jab vo bhale din bhī 'qatīl'
ye zamāna bhī guzar jā.egā