andesha-e-arbāb-e-haram saath rahegā
jannat bhī milegī to ye ġham saath rahegā
pyāse hī guzar jā.eñge ham rāh-e-talab se
ibrat ke liye sāġhar-e-jam saath rahegā
manzil se palaT aa.egī ek ek tajallī
haañ sho.ala-e-ruḳhsār-e-sanam saath rahegā
tū aur na aa.e dar-e-zindān-e-vafā tak
mar kar bhī ye ġham terī qasam saath rahegā
aflāk se palkoñ pe utar ā.eñge taare
khul kar bhī shab-e-ġham kā bharam saath rahegā
mai-ḳhāna bahut duur nahīñ dīda-e-nam se
aa gardish-e-daurāñ koī dam saath rahegā
rāhoñ meñ 'qatīl' ā.eñge sau ā.ina-ḳhāne
lekin mirā gul-posh qalam saath rahegā