pyaar dulār ke saa.e saa.e chalā karo
jalte logo kuchh to apnā bhalā karo
pyaar kī aañch nikhār kā baa.is bantī hai
jalnā hai to pyaar kī aag meñ jalā karo
soch tumhārī kundan ban kar damkegī
kisī kī taptī yādoñ meñ tum Dhalā karo
peḌ yahāñ kuchh sadā-bahār bhī hote haiñ
mausam mausam tum bhī phūlā-phalā karo
koī manzar paañv kī zanjīr nahīñ
vaadī vaadī āzādī se chalā karo
is meñ haiñ kuchh badnāmī ke pahlū bhī
jhūTe chhalbal se mat kisī ko chhalā karo
nañgā kar detī hai ġham ko hañsī 'qatīl'
chehre par ye ġhāza kam kam karā karo