ghabrā ga.e the raah ko pur-ḳhār dekh kar
himmat bañdhī hai qāfila-e-sālār dekh kar
logoñ ko un pe aaj bhī hai rashk aa rahā
be-dām bik ga.e jo ḳharīdār dekh kar
aaqā tumhāre dam se hai rañgīni-e-hayāt
ham jī rahe haiñ bārish-e-anvār dekh kar
chhāñv meñ koī jal rahā hai ye ḳhabar na thī
aa.e the ham to sāya-e-dīvār dekh kar
phir lauT kar na jā sake is rāhguzar se
Thahre the yūñhī zīnat-e-bāzār dekh kar
har zaḳhm ab gulāb kī mānind surḳh hai
jī ḳhush huā hai shiddat-e-āzār dekh kar