is liye dauḌte hī aise haiñ
ham ko kuchh vasvase hī aise haiñ
vaañ pe gandum bhī khā nahīñ sakte
ḳhuld meñ mas.ale hī aise haiñ
yā to saarā jahān bahrā hai
yā to ham bolte hī aise haiñ
ruuh bhī kyā kare miyāñ āḳhir
jism ke mashġhale hī aise haiñ
yā mirā aks jhuuT kahtā hai
yā sabhī aa.ine hī aise haiñ
us ko chhupne meñ lutf aatā hai
ham use DhūñDte hī aise haiñ
jāniye ab hue haiñ aise ham
yā shurūāt se hī aise haiñ