shahr-e-ḳhisht-o-sañg meñ rahne lagā
maiñ bhī us ke rañg meñ rahne lagā
pahle to aaseb thā bastī ke beach
ab vo ik ik añg meñ rahne lagā
apnī sulh-e-dostī laa.ī ye rañg
vo musalsal jañg meñ rahne lagā
tab judā hote na the ab fāsla
darmiyāñ farsañg meñ rahne lagā
us se tark-e-guftugū karne ke ba.ad
soz ik āhañg meñ rahne lagā
shahr-e-ḳhush-poshāñ ko 'azmī' chhoḌ kar
vādī-e-be-rañg meñ rahne lagā