jo tumheñ yaad kiyā karte haiñ
āh-o-fariyād kiyā karte haiñ
kaam un kā hai shab-o-roz yahī
sitam ījād kiyā karte haiñ
tere mai-ḳhāne ko ai pīr-e-muġhāñ
hamīñ ābād kiyā karte haiñ
apnī vahshat se tire dīvāne
dasht ābād kiyā karte haiñ
jām-e-mai pī ke shab-e-furqat meñ
dil ko ham shaad kiyā karte haiñ
mas.ale shaiḳh ke jo sunte haiñ
umr barbād kiyā karte haiñ
'mashriqī' koī sune yā na sune
ham to fariyād kiyā karte haiñ