chāñd ubhregā to phir hashr dikhā.ī degā
shab kī pahnā.ī meñ har aks duhā.ī degā
mere chehre pe kisī aur kī āñkheñ hoñgī
phir kahāñ kis ko kisī or sujhā.ī degā
aap ne aañkh meñ jo ḳhvāb sajā rakkhe haiñ
un ko ta.abīr mirā dast-e-hinā.ī degā
merī hairat mirī vahshat kā pata pūchhtī hai
dekhiye kaun kise pahle rasā.ī degā
jis ne kānoñ pe biThā rakkhe haiñ Dar ke pahre
is ko kab shabd mirā koī sunā.ī degā