ik zamāna guzar gayā hai mujhe
ik ḳhudā ne gale lagāyā thā
jo mire saath chalā aayā thā
terī āvāz kā hī saayā thā
maiñ ne āvāz dobāra dī hai
shāyad ik baar sun na paayā thā
terī peshānī ke sitāre ko
dil mirā chūmne ko aayā thā
ek zanjīr kholnī hogī
ek paañv agar uThāyā thā
ek ḳhushbū mujhe bulātī hai
ik tamannā ne sar uThāyā thā
ab tirī hārne kī baarī hai
jiit kā shauq jo churāyā thā
be-sabab talḳhiyāñ nahīñ hotīñ
zahr barsoñ mujhe pilāyā thā