tumheñ paane kī haisiyyat nahīñ hai
magar khone kī bhī himmat nahīñ hai
bahut sochā bahut sochā hai maiñ ne
judā.ī ke sivā sūrat nahīñ hai
tumheñ rokā to jā saktā hai lekin
mire a.asāb meñ quvvat nahīñ hai
mire ashko mire be-kār ashko!!
tumhārī ab use hājat nahīñ hai
abhī tum ghar se bāhar mat nikalnā
tumhārī hosh kī hālat nahīñ hai
duā kyā duuñ bhalā jaate hue maiñ
tumheñ takne se hī fursat nahīñ hai
mohabbat kam na hogī yaad rakhnā!!
ye baḌhtī hai, ki ye daulat nahīñ hai
zamāne ab tire madd-e-muqābil
koī kamzor sī aurat nahīñ hai