jis tarah dhuup kā rañgat pe asar paḌtā hai

nafs kā vaise ibādat pe asar paḌtā hai

aise mujh par bhī tire ġham ke nishāñ dikhte haiñ

jaise mausam kā imārat pe asar paḌtā hai

sirf māhaul se fikreñ nahīñ badlā kartīñ

dostoñ kā bhī tabī.at pe asar paḌtā hai

dushmanoñ se hī nahīñ hotā hai ḳhatra lāhiq

bāġhiyoñ se bhī hukūmat pe asar paḌtā hai

ab samajh aayā sabab mujh ko mirī pastī kā

maañg ghaTtī hai to qīmat pe asar paḌtā hai

bhuuk nekī kī lage yā ki lage duniyā kī

bhuuk lagtī hai to sūrat pe asar paḌtā hai

rizq ruktā hai namāzoñ ke qazā karne se

niyyateñ bad hoñ to barakat pe asar paḌtā hai

saaf dikhtī hai buḌhāpe meñ qazā sach to hai

umr ke saath basīrat pe asar paḌtā hai

paas rahne se hī baḌhtī nahīñ chāhat 'mohsin'

fāsloñ se bhī mohabbat pe asar paḌtā hai