terī āñkhoñ se dostī huī hai
tab kahīñ jā ke raushnī huī hai
ab tujhe uzr kyā hai aane meñ
dekh barsāt bhī thamī huī hai
ye ḳhasāra to maiñ uThā chukī huuñ
ye mohabbat to maiñ ne kī huī hai
sirf ye shaam hī nahīñ hai sard
barf bātoñ meñ bhī jamī huī hai
tum se itnā bhī kah nahīñ paa.ī
tum se mil kar mujhe ḳhushī huī hai
itne barham ho kis liye āḳhir
kyā mohabbat meñ kuchh kamī huī hai