us chāñd ko tum dil meñ chhupā kyuuñ nahīñ lete
is pyaas kī shiddat ko bujhā kyuuñ nahīñ lete
gar pyaar kī ātish meñ sulagne meñ mazā hai
phir ishq meñ tum ḳhud ko jalā kyuuñ nahīñ lete
ye lāsha-e-jāñ aa.egā ab kaun uThāne
is bojh ko kāñdhoñ pe uThā kyuuñ nahīñ lete
is shahr meñ haiñ laakh tabīboñ kī dokāneñ
bīmār hai gar dil to davā kyuuñ nahīñ lete
hai dil meñ 'riyāz' apne chhupī dard-kahānī
ro-dho ke zamāne ko sunā kyuuñ nahīñ lete