Tuk tū mahmil kā nishāñ de jald ai sūrat zarā

kab talak bhaTke phireñ ab ham se dīvāne ḳharāb

ye bhī kuchh andher hai ab zulf tere darmiyāñ

ghar base shāne kā aur hoñ dil ke kāshāne ḳharāb

dil to ḳhuuñ ho bah gayā aur hai jigar baaqī so ab

us kī bhī hālat lagī ham ko nazar aane ḳharāb

ghar base to ghar meñ kis ke jā basā hai bol uTh

masjideñ vīrāñ haiñ tujh bin aur sanam-ḳhāne ḳharāb

sham.a bhaḌkā sho.ala apnā aag de fānūs ko

kab talak phirte raheñ gird us ke parvāne ḳharāb

chup ho ab to ai 'razā' in ḳhākiyoñ par rahm kar

rone se tere ho.e sab shahr-o-vīrāne ḳharāb