maut bhī aatī nahīñ hijr ke bīmāroñ ko

kyā musībat hai zarā dekhnā bechāroñ ko

nāla-e-dil ne hamāre to asar kam na kiyā

aur ma.azūrī ziyāda huī dil-dāroñ ko

go haiñ jannat meñ maze lek nahīñ bhūlne kā

hoñT kā chāTnā tujh lab ke namak-ḳhvāroñ ko

is se behtar nahīñ kui chiiz sivā bose ke

rū-numā.ī meñ jo deveñ tire ruḳhsāroñ ko

kabhī ronā kabhī sar dhunñā kabhī chup rahnā

kaam karne haiñ bahut se tire be-kāroñ ko

maiñ ne kāġhaz tirī tasvīr kā iisā ko diyā

nusḳha juuñ dete haiñ bīmār sab attāroñ ko

pattharoñ hī pe tajallī hai to ham ġhairat se

āñkhoñ hī meñ liye mar jā.eñge nazzāroñ ko

sab namūna hai haqīqat kā jahāñ tak hai majāz

naas jo karte haiñ gulzāroñ kī dīvāroñ ko

ye ġhazal ḳhidmat-e-navvāb kī hai mīr-'razā'

aur ik dūsrī kah dījiye ham-kāroñ ko