diye kā ruḳh badaltā jā rahā hai
havā ke saath jaltā jā rahā hai
tumhāre hijr kī is aañch meñ ab
hamārā dil pighaltā jā rahā hai
taḌap uTThī hai merī ruuh phir se
badan se tū nikaltā jā rahā hai
nikālo ab mire ghar se hī mujh ko
ye sannāTā nigaltā jā rahā hai
qafas meñ qaid ik panchhī ke jaise
mirā kirdār Dhaltā jā rahā hai
hamārā hijr bhī ab mas.ala ban
zamāne meñ uchhaltā jā rahā hai
use ehsās hai kyā 'mīt' vo ab
mire armāñ kuchaltā jā rahā hai