kyuuñ yaqīñ rakkheñ ḳhayāl-o-ḳhvāb par
jam na jaa.e gard-e-ġham a.asāb par
pīTte rahnā lakīreñ hai abas
ġhaur karnā chāhiye asbāb par
likh rahā hai raushnī kī dāstāñ
ik diyā jaltā huā mehrāb par
apne dukh kā mājrā chheḌā nahīñ
ye mirā ehsān hai ahbāb par
tum bhī duniyā vāloñ jaise ho ga.e
paḌ ga.ī thī kyā nazar surḳhāb par
kashtiyāñ 'rūmī' Dubote ham rahe
tohmateñ lagtī raheñ girdāb par