dariyāoñ se nuur liyā aur miTTī ko pur-nūr kiyā
hariyālī ko dhartī maañ ke māthe kā sindūr kiyā
patthar ko ākār diyā kuchh zevar-shevar laad diyā
aur phir us devī ko apnī rakshā par māmūr kiyā
sūraj taish meñ aa ke saarī fasl jalāne vaalā thā
abr kī talḳh-kalāmī ne is miTTī ko kāfūr kiyā
aazar sañg-tarāshī chhoḌ ke shīshagar ban baiThā thā
ek ajab tahrīk milī aur ḳhud ko chaknā-chūr kiyā
ek shagūfa jhūmar thā gulzār ke chanchal māthe kā
ek kalī ke murjhāne ne bāġhīcha be-nūr kiyā
rāj-kumārī bhiiḌ kī jānib muskā.ī aur lauT ga.ī
jaane kitnoñ ko lalchāyā kitnoñ ko maġhrūr kiyā