ishq kā rog bhalā kaise palegā mujh se

qatl hotā hī nahīñ yaar anā kā mujh se

garm paanī kī nadī khul ga.ī siine pe mire

kal gale lag ke baḌī der vo royā mujh se

maiñ batātā huuñ kuchh ik din se sabhī ko kam-tar

sāhibo uTh gayā kyā merā bharosa mujh se

ik tirā ḳhvāb hī kaafī hai mire uḌne ko

rashk kartā hai mirī jaan parinda mujh se

yak-ba-yak Duub gayā ashkoñ ke dariyā meñ maiñ

bāñdh yādoñ kā tirī aaj jo TuuTā mujh se

kisī patthar se dabī hai merī har ik dhaḌkan

siikh lo zabt kā jo bhī hai salīqa mujh se

koī darvāza nahīñ khultā magar jaan mirī

baat kartā hai tire ghar kā darīcha mujh se

bujh gayā maiñ to ġhazal paḌh ke vo jis meñ tū thā

par huā bazm kī raunaq meñ izāfa mujh se