ġhazal vahī hai jo ho shāḳh-e-gul-nishāñ kī tarah
asar ho jis meñ jamāl-e-parī-ruḳhāñ kī tarah
samajh rahe the ki āsāñ hai ishq kī manzil
havās uḌne lage gard-e-kārvāñ kī tarah
agar hai dil meñ kashish ḳhud qarīb ā.eñge
abhī to duur haiñ vo mujh se āsmāñ kī tarah
masarratoñ ke ḳhazīne bhī us pe qurbāñ haiñ
aziiz mujh ko tirā ġham hai apnī jaañ kī tarah
sunā hai jab se maiñ ḳhalvat-guzīñ huuñ kuchh ahbāb
mirī talāsh meñ haiñ marg-e-nā-gahāñ kī tarah
jahāñ jahāñ se guzarte haiñ ahl-e-ishq-o-vafā
nuqūsh-e-rāh chamakte haiñ kahkashāñ kī tarah
suḳhan-shanās na hoñ jis maqām par 'shāriq'
vahāñ haiñ sher-o-ġhazal jins-e-rā.egāñ kī tarah