to vo nukta hai jise dhyān meñ rakkhā gayā hai

ġhair mumkin sahī imkān meñ rakkhā gayā hai

hairateñ apnī abhī ḳhatm na hone denā

rāz-e-poshīda ik elaan meñ rakkhā gayā hai

sab shanāsā haiñ tire phir bhī to terā chehra

gum-shuda logoñ kī pahchān meñ rakkhā gayā hai

tai shuda hai yahāñ anjām azal se sab kā

faisla vaqt ke juzdān meñ rakkhā gayā hai

is qadar bojh ki shal ho ga.e baazū 'nusrat'

jaane kyā kyā mire sāmān meñ rakkhā gayā hai