sahrā sahrā bhaTak rahī huuñ maiñ
ab nazar aa ki thak rahī huuñ maiñ
bichh rahe haiñ sarāb rāhoñ meñ
har qadam par aTak rahī huuñ maiñ
kyuuñ nazar ḳhud ko maiñ nahīñ aatī
kab se ā.īna tak rahī huuñ maiñ
haa.e kyā vaqt hai ki ab us kī
be-dilī meñ jhalak rahī huuñ maiñ
vaqt se TūTtā huā lamha
aur is meñ dhaḌak rahī huuñ maiñ
jis ne rusvā kiyā mujhe 'nusrat'
us ke aiboñ ko Dhak rahī huuñ maiñ