vahī merī ḳhushī kā mas.ala hai
jo sahrā meñ namī kā mas.ala hai
shajar bhī to zamīñ ke phephḌe haiñ
na kaaTo zindagī kā mas.ala hai
tirā chehra hai dhund-ālūd yuuñ bhī
basārat meñ kamī kā mas.ala hai
hameñ mashkūk nazroñ se na dekheñ
mohabbat to sabhī kā mas.ala hai
nikal aa.ī hai muñh se baat aisī
ki jis kī vāpsī kā mas.ala hai
mirā daftar se jaanā lāzmī hai
mohalle meñ kisī kā mas.ala hai