visāl-ghaḌiyoñ meñ reza reza bikhar rahe haiñ

ye kaisī rut hai ye kin azāboñ ke silsile haiñ

mire ḳhudā izn ho ki mohr-e-sukūt toḌeñ

mire ḳhudā ab tire tamāshā.ī thak chuke haiñ

na jaane kitnī gulāb-sub.heñ ḳhirāj de kar

rasan rasan ghor amāvasoñ meñ ghire hue haiñ

sadā.eñ dene lagī thiiñ hijrat kī apsarā.eñ

magar mire paañv dhartī-māñ ne pakaḌ liye haiñ

yaqīn kar lo ki ab na pīchhe qadam haTegā

ye āḳhirī had thī aur ham is tak aa ga.e haiñ