hameñ to ḳhvāhish-e-duniyā ne rusvā kar diyā hai

bahut tanhā the us ne aur tanhā kar diyā hai

ab aksar ā.īne meñ apnā chehra DhūñDte haiñ

ham aise to nahīñ the tū ne jaisā kar diyā hai

dhaḌaktī qurbatoñ ke ḳhvāb se jaage to jaanā

zarā se vasl ne kitnā akelā kar diyā hai

agarche dil meñ gunjā.ish nahīñ thī phir bhī ham ne

tire ġham ke liye us ko kushāda kar diyā hai

tire dukh meñ hamāre baal chāñdī ho ga.e haiñ

aur is chāñdī ne qabl az vaqt būḌhā kar diyā hai

ta.alluq toḌne meñ pahl mushkil marhala thā

chalo ham ne tumhārā bojh halkā kar diyā hai

ġham-e-duniyā ġham-e-jāñ se judā hone lagā thā

'hasan' ham ne magar donoñ ko yakjā kar diyā hai