shauq har rañg raqīb-e-sar-o-sāmāñ niklā

qais tasvīr ke parde meñ bhī uryāñ niklā

zaḳhm ne daad na dī tañgi-e-dil kī yā rab

tiir bhī sīna-e-bismil se par-afshāñ niklā

bū-e-gul nāla-e-dil dūd-e-charāġh-e-mahfil

jo tirī bazm se niklā so pareshāñ niklā

dil-e-hasrat-zada thā mā.ida-e-lazzat-e-dard

kaam yāroñ kā ba-qadr-e-lab-o-dandāñ niklā

thī nau-āmūz-e-fanā himmat-e-dushvār-pasand

saḳht mushkil hai ki ye kaam bhī āsāñ niklā

dil meñ phir girye ne ik shor uThāyā 'ġhālib'

aah jo qatra na niklā thā so tūfāñ niklā

kār-ḳhāne se junūñ ke bhī maiñ uryāñ niklā

merī qismat kā na ek-ādh garebāñ niklā

sāġhar-e-jalva-e-sarshār hai har zarra-e-ḳhāk

shauq-e-dīdār balā ā.ina-sāmāñ niklā

kuchh khaTaktā thā mire siine meñ lekin āḳhir

jis ko dil kahte the so tiir kā paikāñ niklā

kis qadar ḳhaak huā hai dil-e-majnūñ yā rab

naqsh-e-har-zarra suvaidā-e-bayābāñ niklā

shor-e-rusvā.i-e-dil dekh ki yak-nāla-e-shauq

laakh parde meñ chhupā par vahī uryāñ niklā

shoḳhī-e-rañg-e-hinā ḳhūn-e-vafā se kab tak

āḳhir ai ahd-shikan tū bhī pashemāñ niklā

jauhar-ījād-e-ḳhat-e-sabz hai ḳhud-bīnī-e-husn

jo na dekhā thā so ā.īne meñ pinhāñ niklā

maiñ bhī māzūr-e-junūñ huuñ 'asad' ai ḳhāna-ḳharāb

peshvā lene mujhe ghar se bayābāñ niklā