ġhāfil ba-vahm-e-nāz ḳhud-ārā hai varna yaañ
be-shāna-e-sabā nahīñ turra gayāh kā
bazm-e-qadah se aish-e-tamannā na rakh ki rañg
said-e-ze-dām-e-jasta hai us dām-gāh kā
rahmat agar qubūl kare kyā ba.iid hai
sharmindagī se uzr na karnā gunāh kā
maqtal ko kis nashāt se jaatā huuñ maiñ ki hai
pur-gul ḳhayāl-e-zaḳhm se dāman nigāh kā
jaañ dar-havā-e-yak-nigah-e-garm hai 'asad'
parvāna hai vakīl tire dād-ḳhvāh kā
uzlat-guzīn-e-bazm haiñ vāmāñdagān-e-dīd
mīnā-e-mai hai aabla pā-e-nigāh kā
har gaam aable se hai dil dar-tah-e-qadam
kyā biim ahl-e-dard ko saḳhtī-e-rāh kā
tā.ūs-e-dar-rikāb hai har zarra aah kā
yā-rab nafas ġhubār hai kis jalva-gāh kā
jeb-e-niyāz-e-ishq nishāñ-dār-e-nāz hai
ā.īna huuñ shikastan-e-tarf-e-kulāh kā