phir is andāz se bahār aa.ī

ki hue mehr-o-mah tamāshā.ī

dekho ai sākinān-e-ḳhitta-e-ḳhāk

is ko kahte haiñ ālam-ārā.ī

ki zamīñ ho ga.ī hai sar-tā-sar

rū-kash-e-sat.h-e-charḳh-e-mīnā.ī

sabza ko jab kahīñ jagah na milī

ban gayā rū-e-āb par kaa.ī

sabza o gul ke dekhne ke liye

chashm-e-nargis ko dī hai bīnā.ī

hai havā meñ sharāb kī tāsīr

bāda-noshī hai bāda-paimā.ī

kyuuñ na duniyā ko ho ḳhushī 'ġhālib'

shāh-e-dīñ-dār ne shifā paa.ī