mehrbāñ ho ke bulā lo mujhe chāho jis vaqt

maiñ gayā vaqt nahīñ huuñ ki phir aa bhī na sakūñ

zo.af meñ tāna-e-aġhyār kā shikva kyā hai

baat kuchh sar to nahīñ hai ki uThā bhī na sakūñ

zahr miltā hī nahīñ mujh ko sitamgar varna

kyā qasam hai tire milne kī ki khā bhī na sakūñ

is qadar zabt kahāñ hai kabhī aa bhī na sakūñ

sitam itnā to na kiije ki uThā bhī na sakūñ

lag ga.ī aag agar ghar ko to andesha kyā

sho.ala-e-dil to nahīñ hai ki bujhā bhī na sakūñ

tum na aaoge to marne kī haiñ sau tadbīreñ

maut kuchh tum to nahīñ ho ki bulā bhī na sakūñ

hañs ke bulvā.iye miT jā.egā sab dil kā gila

kyā tasavvur hai tumhārā ki miTā bhī na sakūñ