yaaro ghar aa.ī shaam chalo mai-kade chaleñ
yaad aa rahe haiñ jaam chalo mai-kade chaleñ
dair-o-haram pe khul ke jahāñ baat ho sake
hai ek hī makān chalo mai-kade chaleñ
achchhā nahīñ piyeñge jo piinā harām hai
jiinā na ho harām chalo mai-kade chaleñ
yaaro jo hogā dekheñge ġham se to ho najāt
le kar ḳhudā kā naam chalo mai-kade chaleñ
saaqī bhī hai sharāb bhī āzādiyāñ bhī haiñ
sab kuchh hai intizām chalo mai-kade chaleñ
aisī fazā meñ lutf-e-ibādat na aa.egā
lenā hai us kā naam chalo mai-kade chaleñ
fursat ġhamoñ se paanā agar hai to aao 'nūr'
sab ko kareñ salām chalo mai-kade chaleñ