panāheñ DhūñDh ke kitnī hī roz laatā hai
magar vo lauT ke zulfoñ kī samt aatā hai
sulagtī ret hai aur ThanDe pāniyoñ kā safar
vo kaun hai jo hameñ rāsta dikhātā hai
hai intizār mujhe jañg ḳhatm hone kā
lahū kī qaid se bāhar koī bulātā hai
jo mushkiloñ ke liye hal talāsh laayā thā
khilaune baañT ke bachchoñ meñ muskurātā hai
tamām rāste ab ek jaise lagte haiñ
gumān raah meñ shakleñ badal ke aatā hai
shikār dhund kā sahrā-navard karte haiñ
fareb khānā kahāñ dūsroñ ko aatā hai