Rafiq Raaz

abr hun aur barasne ko bhi tayyar hun main

Rafiq Raaz

1954

abr huuñ aur barasne ko bhī tayyār huuñ maiñ

tujh ko sairāb karūñgā ki dhuāñ-dhār huuñ maiñ

ab to kuchh aur ḳhatrāt se do-chār huuñ maiñ

apne sar pe laTaktī huī talvār huuñ maiñ

tab maiñ ik aañkh thā jab to koī manzar bhī na thā

aaj tasvīr hai to naqsh-ba-dīvār huuñ maiñ

hijr ke ba.ad ke manzar kināya huuñ koī

ik dhuāñ pas-e-dīvār-e-shab-e-tār huuñ maiñ

merā sarmāya to bas manzar-e-be-manzarī hai

shahr-e-be-aks ik ā.īna-bardār huuñ maiñ

Daal ke sar ko girebāñ meñ laraz uThtā huuñ

muTThī-bhar ḳhaak nahīñ ek siyah ġhaar huuñ maiñ

dekh shāmil nahīñ is meñ koī mere sivā

dekh kis qāfila-e-zāt sālār huuñ maiñ

bas yahī hai mire hone javāz aur surāġh

ik na hone se miyāñ bar-sar-e-paikār huuñ maiñ

Top Urdushayar.com