ye sar-buland hote hī shāne se kaT gayā
maiñ mohtaram huā to zamāne se kaT gayā
maañ aaj mujh ko chhoḌ ke gaañv chalī ga.ī
maiñ aaj apne ā.īna-ḳhāne se kaT gayā
joḌe kī shaan baḌh ga.ī mahfil mahak uThī
lekin ye phuul apne gharāne se kaT gayā
ai āñsūo tumhārī zarūrat hai ab mujhe
kuchh mail to badan kā nahāne se kaT gayā
us peḌ se kisī ko shikāyat na thī magar
ye peḌ sirf biich meñ aane se kaT gayā
varna vahī ujaaḌ havelī sī zindagī
tum aa ga.e to vaqt Thikāne se kaT gayā