muḳhtasar hote hue bhī zindagī baḌh jā.egī
maañ kī āñkheñ chuum liije raushnī baḌh jā.egī
maut kā aanā to tai hai maut aa.egī magar
aap ke aane se thoḌī zindagī baḌh jā.egī
itnī chāhat se na dekhā kījiye mahfil meñ aap
shahr vāloñ se hamārī dushmanī baḌh jā.egī
aap ke hañsne se ḳhatra aur bhī baḌh jā.egā
is tarah to aur āñkhoñ kī namī baḌh jā.egī
bevafā.ī khel kā hissa hai jaane de ise
tazkira us se na kar sharmindagī baḌh jā.egī