achchhī se achchhī āb-o-havā ke baġhair bhī
zinda haiñ kitne log davā ke baġhair bhī
sāñsoñ kā kārobār badan kī zarūrateñ
sab kuchh to chal rahā hai duā ke baġhair bhī
barsoñ se is makān meñ rahte haiñ chand log
ik dūsre ke saath vafā ke baġhair bhī
ab zindagī kā koī bharosa nahīñ rahā
marne lage haiñ log qazā ke baġhair bhī
ham be-qusūr log bhī dilchasp log haiñ
sharminda ho rahe haiñ ḳhatā ke baġhair bhī
chāragarī batā.e agar kuchh ilaaj hai
dil TūTne lage haiñ sadā ke baġhair bhī